‘Pantailak euskaraz’ hitzaldiak informazioa eta prestakuntza uztartuko ditu.
Hitzaldia datorren martxoaren 12an izango da, 18:00etan, eta Patxo Larrinoa eta Mikel Izagirre izango dira hizlariak.
Eremu digitalean euskararen presentzia eta erabilera sustatzeko ahaleginean, Amorebieta-Etxanoko Udalak ‘Pantailak Euskaraz’ ekimenaren barruan hitzaldia antolatu du, informazioa eta prestakuntza uztartuko dituena. Patxo Larrinoa eta Mikel Izagirre izango dira hizlariak datorren martxoaren 12an, 18:00etan, Zelaietako Auditoriumean. Ekimen honek hainbat urte daramatza martxan, eta helburu du gure eguneroko bizitzako pantailetan euskararen presentzia areagotzeko erronkari aurre egitea, bai lan-eremuan, bai aisialdian.
Euskara ingurune digitalean
Aro digitalak aldatu egin du informazioarekin eta entretenimenduarekin elkarreragiteko modua, eta pantailak konstante bihurtu dira gure bizitzetan. Hala ere, euskarak bere lekua aurkitzeko lehian jarraitzen du eremu honetan. Errealitate horri erantzuteko sortu da ‘Pantailak Euskaraz’ ekimena, euskara plataforma digitaletan sartzearen garrantzia azpimarratzeko, eta haren erabilera eta babesa sustatzeko.
Euskararen presentzia areagotzeko baliabideak eta estrategiak
Bertan, ‘Pantailak Euskaraz’ ekimeneko Patxo Larrinoak eta ‘Zer non ikusi’ atariaren sortzaileak Mikel Eizagirrek hartuko dute parte, plataforma digitaletan euskarak bizi duen egoeraren ikuspegi zehatza eskainiz. Gainera, pantailekiko eguneroko interakzioetan hizkuntzaren presentzia areagotzeko diseinatutako hainbat baliabide eta estrategia aurkeztuko dira. Tresna horiek eremu digitalean euskararako sarbidea zabaltzeaz gain, herritarren artean euskararen erabilera aktiboa sustatzera bideratuta daude.
Interpretazio zerbitzua
Ekitaldia euskaraz egingo bada ere, gaztelaniarako interpretazio-zerbitzua eskainiko zaie eskatzen dutenei. Zerbitzu hori erabiltzeko, interesdunek Telegram aplikazioa deskargatu beharko dute gailu mugikorretan eta entzungailuak eraman.