Ekimen honen helburua da zornotzarrek herriko jaien plangintzan eta antolaketan parte hartzea.
Amorebieta-Etxanoko Udalak, Jai Batzordearekin elkarlanean, herritarrei zuzendutako galdetegi publiko bat zabaldu du, Karmen eta Santanatxu 2024ko jaietako kontzertuetarako proposamenak eta iradokizunak jasotzeko. Herritarrek parte hartzeko prozesu hori abenduaren 10era arte egongo da irekita, eta adin guztietako pertsonek parte har dezakete.
Kultura, Kirol eta Herritarren Segurtasuneko zinegotzia den Koldo Bilbaok azpimarratu du ekimen honen helburu nagusia dela zornotzarrek herriko jaien plangintzan eta antolaketan duten parte-hartzea indartzea: “Jai Batzordetik eta Udaletik uste dugu funtsezkoa dela herritarren lehentasunak eta nahiak bertatik bertara ezagutzea. Horri esker, Amorebieta-Etxanoko biztanle guztien interesak eta gustuak islatzen dituen jai-programa bat diseinatu ahal izango dugu”.
Parte hartzeko eta proposamenak helarazteko, herritarrek ondorengo esteka erabil dezakete: https://forms.gle/SXtChxV4RWPt9nyo7
Bertan, herritarrei jaietan ikusi nahiko lituzketen musika eta artistei buruzko galderak egiten zaizkie, eta jaietarako iradokizunak egiteko aukera ere ematen zaie. Bildutako informazioa berrikusi eta kontuan hartuko du Udalak datorren urteko jaien plangintzan.