Udalak berretsi du udalerrian euskara eta hizkuntza-aniztasuna sustatzeko konpromisoa, azken Osoko Bilkuran aho batez onartutako adierazpen instituzionalean islatu zen bezala.
Euskararen Nazioarteko Eguna dela eta, Amorebieta-Etxanoko Udalak hainbat ekitaldi antolatu ditu zornotzarren artean hizkuntza aniztasunaren inguruan sentsibilizatzeko eta euskararen erabilera sustatzeko. Amorebieta-Etxanoko Udalak berretsi du udalerrian euskara eta hizkuntza-aniztasuna sustatzeko konpromisoa, azken Osoko Bilkuran aho batez onartutako adierazpen instituzionalean islatu zen bezala.
Ekitaldiak honakoak izango dira:
Abenduak 29, 18:00etan
Euskararen erabilera: jardunbide egokiak kirolean. Ekitaldi honetan, herriko kirol elkarteak haur eta gazteen artean euskararen erabilera sustatzeko esperientziak eta praktika onak partekatzeko batuko dira. Helburua etorkizuneko erronkak identifikatzea eta komunitatean euskara sustatzen jarraitzeko jarduera-ildoak zehaztea da.
Abenduak 1, 17:30-19:30
Oihane Amantegiren “Ibaiertzeko ipuina” liburuaren irakurketa jarraitua. Amorebieta-Etxanoko hainbat herritarrek Oihane Amantegi herriko idazlearen “Ibaiertzeko ipuina” liburua irakurriko dute. Ondoren, Kantakatiluko kideek, trikitixak lagunduta, giroa alaituko du abestiekin. Herritar guztiak gonbidatzen dira kantuarekin bat egitera eta arratsalde atsegin batez gozatzera.
Abenduak 2, 17:00-18:45
Doraemon: Nobitaren dinosaurio berria. Nobitak dinosauroen erakusketa bat bisitatu du ikastetxearekin, eta dinosauro arrautza baten fosila dirudien harri bat aurkitu du. Doraemonen garaiko zapiarekin, fosila bere jatorrizko egoerara itzultzen du, eta arrautzatik bi dinosauro biki ateratzen dira, Kyu eta Myu deituak. Nobitak isilpean hazten ditu, baina handiagoak egiten direnean eta ezin dituenean bere gelan.
Abenduak 3, 20:00
Zuhaitz Gurrutxagaren “Futbolistok” bakarrizketa. Zornotza Aretoan, Zuhaitz Gurrutxaga futbolari ezagunak Realeko jokalari gisa izandako bizipenak eta pasadizoak partekatuko ditu, baita Nahaste Obsesibo-Konpultsiboarekin (TOC) izandako esperientzia pertsonala ere. Umorez, Gurrutxagak norbere buruaz barre egitearen garrantzia azpimarratu nahi du eta eguneroko erronkei jarrera positiboarekin aurre egin.
Gainera, Ludotekan eta Gazte Txokoan, haurrek eta gazteek Euskararen Egunarekin lotutako tailerrak eta jolasak izango dituzte abenduaren 1etik 4ra.
ADIERAZPEN INSTITUZIONALA EUSKARAREN NAZIOARTEKO EGUNA – 2023
Euskararen Nazioarteko Egun honetan gogorarazi behar dugu euskal gizarteak bi hizkuntza ofizial dituela, baina oraindik urrun gaudela gizarte elebidun orekatua izatetik. Bi hizkuntza horietatik euskara hizkuntza gutxitua da, eta ezinbestekoa da gizarteko esparru guztietan herritarren hizkuntza-eskubideak bermatuta egotea ahalik eta modu orekatuenean.
Hizkuntza aniztasuna eta berdintasuna babesteko ezinbestekoak dira botere publikook eskaini ditzakegun araudi eta neurri positibo guztiak. Tamalez, azkenaldian, areagotzen joan dira auzitegietatik euskararen normalizazioaren aurka ateratako sententziak; herritarren hizkuntza-eskubideak murriztea eragiten ari direnak. Udalok herritarrengandik hurbilen gauden adiministrazioak izanik funtsezko rola dugu, eta geure egitekoa da euskararen normalizazioak behar dituen arau eta legeak abian jartzea, automurrizketarik gabe, ausart jokatuz, euskararen normalizazioa zeharlerro izan dadin eta herritar guztien hizkuntza eskubideak errespetatu daitezen; inor diskriminatu gabe bere hizkuntzagatik.
Horrez gain, asko dira gure herrira beste hainbat tokitatik etorri direnak eta gaur egun datozenak. Horiek guztiek ere beren hizkuntza dakarte, eta hizkuntza horiek ere gure errekonozimendua merezi dute.
Horiek horrela, Amorebieta-Etxanoko Udalak Euskararen Nazioarteko Egunean honako konpromisoak hartzen ditu:
- Amorebieta-Etxanoko Udalak euskararen erabilera guztiz normalizatua izan dadin beharrezko diren araudiak indarrean jarriko ditu. Ildo horretan, Udalak Euskaren Normalizaziorako Erabilera Plan Berria onartuko du, eta arduratsu jokatuko du bertan jasota dauden Hizkuntza Irizpideak bete daitezen; euskararen erabilera instituzionala eta administratiboa erabatekoa izan dadin. Halaber, ausart jokatuko du auzitegietatik datozen sententziak gorabehera.
- Amorebieta-Etxanoko Udalak Plan Estrategiko (ESEP) berria onartuko du, gure udalerriko esparru guztietan euskararen erabilera areagotzeko, eta horretan sustatzaile direnak saritzeko. Horretarako, behar diren baliabideak jarriko ditu. Plan estrategiko hori garatzeko ateak irekitzen dizkie herritarrei, eta eskertu egingo dizkie egin ditzaketen ekarpenak.
- Beste herrialde batzuetatik etorri direnen hizkuntzak eta kulturak errespetuz jasoko ditu, eta bidea erraztuko du hizkuntzen arteko elkarbizitza bermatzeko.
Eta beste barik, ekin euskaraz!