Indarrarekin lotutako diziplinek izan duten gehikuntzari erantzunez, Udalak kardio ariketak egiteko makina bat eta zazpi indar makina erosi ditu. Horrez gain, kirolerako material berria ere eskuratu da.
Udalak 38.000 euro inguruko aurrekontua bideratu du.
Amorebieta-Etxanoko Udalak Larrea kiroldegiko fitness instalakuntza gaur egungo zornotzarren beharretara egokitu du. Hala, aretoa bera berrantolatzeaz gain, zortzi makina berri eta kirolerako materiala erosi ditu. Guztira 38.000 euro inguruko aurrekontua bideratu du.
Gehikuntza indarrarekin lotutako diziplinetan
Azken urteetan kirol jardueren joerak aldatu egin direla jabetuta, Amorebieta-Etxanoko Udalak instalazioak egokitzeko beharra aztertu du. Izan ere, gehikuntza nabaritu da, batez ere, indarrarekin lotutako diziplinetan. Hala, eta azterlan bat egin eta adituen aholkuei jarraiki, fase ezberdinetako ekimenak aurreikusi dira. Joan den astean, 8 makina berri instalatu ziren eta aretoaren berrantolaketari ekin zitzaion espazioari ahalik eta etekin handiena eta egokiena ateratzeko asmoarekin: beheko solairuan kardio makinak jarri dira eta goiko solairuan muskulaziorako edo indar diziplinarako makinak. Horiez gain, kiroletarako material berria ere eskuratu du Udalak, begiraleen eta erabiltzaileen beharrei erantzunez.