Arau-marko berri honen helburua da espazio publikoen erabilera modu eraginkorrean arautzea eta espazio publikoan bizikidetzarako oinarriak ezartzea.
Ainhoa Salterain alkatea 50 ostalari ingururekin elkartu da, terrazen erabileraren erregularizazioa beraiekin lehen pertsonan aztertzeko.
Espazio publikoak eta herritarren bizikidetza arautu eta hobetzeko bidean urrats garrantzitsua eman du gaur Amorebieta-Etxanoko Udalak espazio publikoa eta kaleko salmenta arautzen dituen Ordenantzari aurreneko onarpena emanda. Arau-esparru berri horren bidez, modu eraginkorragoan arautu nahi dira espazio publikoen erabilera, hala nola, garrantzi handiko ekitaldiak, merkatuak, azokak eta azoka txikien antolaketa… era berean, espazio publikoen bizikidetzarako oinarriak ezarri nahi dira.
Ordenantzak terrazen erabileraren erregulazioa ere jorratzen du, udalerriko ostalaritza sektorearentzat garrantzi berezia duen gaia. Ildo horretan, Ainhoa Salterain alkateak terrazako lizentzia duten 50 ostalari ingururekin pertsonalki biltzeko ekimena hartu du. Topaketa horien helburua bikoitza izan da: alde batetik, araudi berriaren inplikazioak eta betekizunak zehatz-mehatz azaltzea; bestetik, sektoreko profesionalen egungo egoera eta kezkak entzutea eta ulertzea.
Bilera horiek beharrezkoak izan dira ostalariek araudi-aldaketen berri dutela bermatzeko, eta baita udal-administrazioak beren iritziak eta iradokizunak zuzenean jaso ahal izateko ere. Hurbilketa honek Amorebieta-Etxanoko Udalak elkarrizketa eraikitzailearekin eta bertako ostalaritza eta komertzioarekin lankidetzarekin aritzeko duen konpromisoa islatzen du.
Ordenantza Bizkaiko Aldizkari Ofizialean martxoaren 8an argitaratu da. Hori horrela, 30 egun balioduneko epea ireki da, herritarrek eta alderdi interesdunek alegazioak aurkez ditzaten.