Korrikaren edizio honen aurkezpen ofiziala bihar egingo da, otsailak 1, Zelaietan, Amorebieta-Etxanoko AEKren eskutik.
Korrikaren 23. edizioak Zornotzako kaleak zeharkatuko ditu martxoaren 22an, 17:30etik aurrera.
Amorebieta-Etxanoko Udalak Korrikaren 23. edizioaren esparruan antolatu dituen kultura-ekitaldi batzuen berri eman du. Euskara sustatzen duen ekitaldi honek Euskal Herria zeharkatuko du martxoaren 14tik 24ra, Irunen hasi eta Baionan amaitu. Korrikaren ibilbidea Zornotzatik igaroko da martxoaren 22an, eta Zornotzako bizilagunei euskararen aldeko ospakizun horretan parte hartzeko aukera paregabea emango zaie.
“Korrikaren historia irudietan” erakusketa
Programatutako lehenengo jarduera “Korrikaren historia irudietan” erakusketa da. Otsailaren 2ra arte bisitatu daiteke, Zelaietako lehen solairuan. Erakusketa honek Korrikaren historian atzera egiteko aukera ematen du, informazio-panalen jasota dauden argazkien, lemen, logoen eta omenaldien bidez Korrikaren edizioz-edizioko materiala ikusi baitaiteke.
Aurkezpena bihar, Zelaietan
Bihar, otsailak 1, 19:00etan, Korrikaren 23. edizioaren aurkezpena egingo da Zelaietan, Amorebieta-Etxanoko AEKren eskutik. Ekitaldi horrek markatuko du gure herrian Korrikarekin zerikusia duten jardueren hasiera ofiziala.
“Porrotx eta Marimots” eta “Go! azen 10.0”
Haur eta gazte zornotzarren dibertimendurako, hainbat ikuskizun egingo dira otsailaren 9an eta 10ean. Ostiralean, “Porrotx eta Marimotots” pailazoek “Ez gara jaitsi!” ikuskizuna eskainiko dute. Hurrengo egunean, “Go!azen 10.0” telebista saioa Zornotzara iritsiko da Basakabiko gazteen eskutik, eta energiaz eta dibertimenduz betetako ekitaldi bat taularatuko dute.
Antzerkia, zinema eta hitzaldia
Otsailaren 16an, Tautelak konpainiako Maite López eta Aroa Blanco aktoreek “Euskaldungak” antzerkia aurkeztuko dute. Ikuskizun honetan euskaldun berri baten eta euskaldun zaharraren eta euskararen arteko harremanari helduko zaio, gogoeta kulturala eta linguistikoa eskainiz.
Otsailaren 29an, Josu Martínez zuzendariaren “Bizkarsoro” filma emango da. Filma Donostiako Jaialdian estreinatu zen eta Euskal Herri osoko zinemetan ikusi daiteke urtarrilaren 12az geroztik. Bizkarsoroko herriaren fikziozko historia kontatzen du filmak, euskaraz bizitzeagatik jazarri dituzten euskaldun guztien ordezkari gisa. 1914 eta 1982 bitartean gertatutako bost istoriok osatzen dute filma, eta kontakizun hunkigarria da, ahozko lekukotasunetan eta testu idatzietan oinarritua.
Martxoaren 12an, Patxo Larrinoak (Pantailak Euskaraz) eta Mikel Eizagirrek (Zer Non Ikusi) “Patailak Euskaraz, ezinbesteko erronka” hitzaldia egingo dute. Pantailetan euskararen presentzia sustatzen duen Pantailak Euskaraz ekimenean oinarritzen da ekitaldi hau. Hitzaldia euskaraz izango da, eta Telegram aplikazioaren bidez gaztelaniarako interpretazio-zerbitzu bat izango du, hala behar dutenentzat (beharrezkoa da entzungailuak eramatea).
Korrika 23 Amorebieta-Etxanon
Azkenik, martxoaren 22an, Korrikaren 23. edizioa Amorebieta-Etxanon izango da, 17:30etik aurrera. Dimatik sartuko da eta gure udalerriko kaleetatik igaro ondoren, Korrika Iurretarantz joango da. Egunean zehar, kaleak musikarekin animatuta egongo dira eta, Korrika igaro ondoren, familientzako musika-ikuskizun bat egingo da Herriko Plazan (edo Zubiondo parkean eguraldi txarra izanez gero). Jardunaldia Txalo konpainiaren “Almazenean” antzerkiarekin amaituko da, Zornotza Aretoan.
Amorebieta-Etxanoko Udalak Zornotzako bizilagunak gonbidatu nahi ditu kultura-jarduera horietan parte hartzera eta martxoaren 22an, Korrika Zornotzako kaleetatik igaroko den egunean, euskararen ospakizunarekin bat egitera animatzen ditu.